零碎點滴

上星期5,腦細接咗單大嘢,佢真係好開心...唔知呢次,佢可以分幾多,呢個上司,我跟咗2個月唔夠,其實都未摸到佢個底係點,不過總之都係做好自己嘢,但求佢唔好投訴我就算,呢單嘢,計一計,Phase One都已經要做到5月中,但5月一開波,已經51同佛誕,神早已經放咗班同事放假,臨時臨急,連續假期如果要班同事返工,比著自己都好唔開心,結果,自己就勤力啲,星期五至星期一紅日都返工又夜走,星期五夜晚,仲要冇返屋企,喺公司做到攰,就直接趴喺張檯度訓覺,訓醒又繼續做,星期六返到下晝,先返屋企沖個涼,然後去咗赤柱曬太陽,訓咗2,3個鐘,回一回氣再返公司繼續做,最後都搞到夜晚兩點幾.第2朝返完教會就又返工,點半先返到屋企,第2朝又再一早返工,不過就六點就走,返去煮咗2餸1湯,食完飯先去Gym.

打返自己做過乜,都打到悶,OMG!

其實真係好鐘意OT,唔係因為工作狂,只係,同事走曬,又冇電話,可以專專心心咁做嘢,成日日頭,接個電話,就要搞我半個鐘,轉頭一個同事交嘢,要幫佢睇一次有冇錯,又冇咗我3幾個字,所以夜晚OT,或者一早返工,可以清到好多好多工作.

呢個星期,少咗探老公,因為佢除咗隻彎咗既手婉外,佢做多10日左右物理治療,應該可以自己行路,所以而家一路仲喺醫院,主要係等佢正常行到路先,如果唔係佢日日返醫院都麻煩.

層樓,放緊盤,都有幾個傾緊,可能呢個星期有機會收訂,主要都係要睇老公幾時返去清返佢既嘢.

呢排有位BKJM介紹咗隻交友Apps,玩咗幾日,開始了解緊「男人」,係咪我真係太過唔了解佢地呢?

Netgear係咪真係得架?

搬咗屋之後,屋企上網,一路都係靠iPad張公司比既無限上網Sim卡頂住,不過因為遲早都要裝埋Cam,都係要裝返個寬頻,咁即係又要裝無線Router.

市面上既Router真係多到呢,結果搵搵吓,我發覺Netgear,本身出開Router,呢2年又出埋Cam,又有送貨同上門裝機既服務,就咁啦,同一般既IP Cam唔同,如果要錄埋,要預備多部電腦或NAS去幫手錄片,但Netgear似乎靠佢自己個服務,就可以做到,當然就要比錢,不過我又唔駛裝唔駛剩,好似又方便好多,結果就咁網上訂咗部Nighthawk X10 (R9000)同3隻Arlo Q,希望後日裝機順利啦.


後日裝寬頻同裝Netgear既Router同Cam.

C Day經過

開咗佢部電話,不堪入目既一切.

唔止不堪入目既Whatsapp Group,唔止IG Direct入面既邀約, 仲有Wechat入面既, 2年前仲有好多FB Messager既私影妹妹, 所有嘢都不堪入目...另外亦比我發現,佢有個我唔想喺度公開講既壞習慣,比我發現埋.

總之,一切,一切,本來我要開佢手機嗰日,已經去完產檢,都要即刻再預約第2日再緊急預約產檢...驗HIV,驗性病,同埋問醫生,佢個壞習慣到底對BB豬點樣.

C Day : 老公喺個客到噴射式咁嘔,之後昏迷,當日已清曬腦入面既血,同埋腦壓回復正常
C Day + 4: 老公繼續昏迷,個指數冇變過.我去到當日,爹地介紹佢同學我識,係腦科,咁講左大概既情況,佢覺得可以搏一搏,之後就全日都搞轉院既嘢,真係都幾煩,不過總之最後都轉到.
C Day + 5: 朝早做產檢,下晝返醫院,由早一晚做唔同既檢查,到第2日,黃昏左右決定第2日即刻再開腦做手術,呢日我用老公隻手指開手機,睇完,我同BB同埋自己講我會對我地再好D...(我講真,好認真)
C Day + 6: 朝早再緊急去醫生度做檢查,問返老公個壞習慣同其他所有既行為,對BB豬既影響,順便再驗埋HIV,同其他性病之類.老公日頭做手術,深夜個昏迷指數開始慢慢上返.
C Day + 7: 尋日HIV快速測試OK,其他報告都OK(呼一口氣).老公開始半醒半訓既狀態,奶奶除咗C Day + 4鬧我之後,冇再鬧我,不過仍然當我透明.
C Day + 8: 老公開始真係醒,講嘢唔太清楚,右手手婉彎咗,佢醒返,我同佢講咗句:好耐無見,你幾好嘛?
C Day + 9: 老公可以坐起身,我感覺上係當佢係我一個親人咁,見到佢好返D,其實都開心,但對佢真係無曬愛既感覺,我屋企人今日都有嚟探佢,99繼續當我透明,但明顯開心返.夜晚6299落咗去食飯,我同老公講:婚,我會等佢隻手簽到紙就離,你xxx(壞習慣)+出面搞咁多女人,我有齊所有證據,好好睇睇,最好你自己同你屋企講返你做過乜搞到我走,至少都同你屋企講你xxx(壞習慣),而我有BB所以要離婚,但我唔會逼你講出面有女人既野....我話我成個屋企,咁多年無人離過婚,好好睇睇...大家做埋場戲佢,你xxx(壞習慣)其實都唔難落台...最後,我自己喺間餐廳到爆喊,由C Day + 4知道佢中風之後,我都冇喊過,比奶奶鬧半個鐘我都冇喊,但我今晚喊得好勁...一段真係要ByeBye既感情
C Day + 10: 全日要招呼佢既親友,同事,62比咗壺湯我,話99煲比我飲既,又買咗袋魚比我,不過勁腥囉,全個病房都有味,即刻返屋企處理,逐條魚開肚清腸剪鰓去鱗,40條細魚搞左1個鐘,條腰又痛痛地,星期2叫家務助理幫我煲湯.然後再返醫院.

換冷氣,我要抽溼都唔要慳電

呢幾日又熱又潮濕,租緊間屋既冷氣,應該冇10年都有8年,無論點洗隔層網,都仲係有陣霉味,另外就係製冷方面好弱,開到第二朝,間房都仲係好似暖暖地,濕濕地咁.

今朝打比業主,問佢如果我自費換曬全屋冷氣,有冇問題,然後業主既答覆,真係令我企咗喺度,佢話可以換,但我搬走嗰時,要還原返原本幾部機比佢,嘩,即係我要搵地方,放3部舊冷氣,先可以換冷氣.

冇辦法,都係要搵搵租屋個地產Agent幫手問多次業主,係咪我搬走,唔拆走新機都唔得,好在,應該都係業主驚我拆走曬啲新機,到時個窗得返個窿喺度,咁我而家同佢約返,話佢知會點裝心機,同喺雙方張租單上面寫清楚,佢而家又肯比我裝啦.

去搵吓啲冷氣資料,我想要慳電啦,抽濕力強啦,變頻啦,冷暖氣啦,我諗住BB豬冬天嗰時可以用到,點知原來,變頻既抽濕功能就一定差啲,喺環保同除濕中間,我揀咗抽濕.

用咗一個字搵Price.com.hk,過埋錢,約埋時間上嚟度位,幾時都係買嘢效率係最高.

3%既希望

上星期試吓返教會,張木凳,坐到PatPat痛.不過全程冇訓著,好叻女.堂道我聽到既大意好簡單:就係唔好到復活節先紀念耶穌,而係每日都紀念耶穌...大概係咁啦.

當我望到老公部電話,心跳得好快,呢輪,每逢心情有起伏時,我就會摸摸BB豬,我冇用過iPhone,但我知,如果未熄機,我只要用老公隻手指就可以開到部機,我開一開個Mon,冇熄機,仲有3%電,即刻熄返個Mon,我從來未Check過老公既嘢,睇佢手機,已經好似做賊咁,我唔知,開佢部機,警察會唔會拉我,話我不誠實使用電腦,不過唔理嘞,好奇心打贏曬我既理智同道德價值,嗰時三更半夜,夜媽媽我都唔知邊度搵條iPhone線,我諗起佢部車會有差電線,等我安頓好老公之後,我去返數碼港拎車,反正個袋入面又有車匙.

----------------------------

連續假期第4日,我習慣如果日本唔係放假,而香港呢邊放長假,我會返一返公司,Check Mail或為到下個月既貨做Forecast,咩都好,最鐘意冇電話,冇同事既日子做嘢,可以專心做嘢,下晝都做到7788,諗住做多個鐘就去做運動,老豆忽然打嚟,話老爺打比佢,話我老公前幾日,中咗風昏迷咗,我而家肯唔肯返去見佢.

放低電話,頭幾分鐘,覆埋幾個Msg,摸摸個肚,依,咁我應該點呢?我係咁問自己,我都唔知點,我應該點?然後又成Keybroad淚水.

之後回一回魂,熄電腦,去洗手間,搭電梯,截的士,去到醫院,準備上病房,點知電梯口撞到奶奶,佢應該好緊張個仔,佢知我搬走咗,但唔知點解個新抱會搬走,所以一見到我,就開始鬧我,鬧咩呢?

-有產前抑鬱唔睇醫生

-唔睇住佢個仔

-搬走唔講,就咁走咗去

-大肚大曬啊

-老公冇比家用你(我)啊

-冇責任心

-死咗去邊

-老公病成咁周圍去

-係咪出面有男人

-搬咗去契家佬屋企住

-個BB係咪佢個仔㗎?

咁佢一路鬧,就越嚟越激動,可能個腦既養氣又唔係好夠,越鬧就越遠,不過我都估到佢會鬧乜,所以都冇咩嘢,只係時不時出句聲:咁你不如比我睇咗你個仔先啦....x 1萬次

其實我個腦都已經繼續計緊數,從最壞既方向諗,佢真係一路昏迷既話,唔好計醫療,或者轉去療養院嗰筆先,首先我要繼續供樓啦,要交2個人既雜費啦,老爺奶奶既生活費啦,咁即係每個月幾錢,現金流頂唔頂得順,有冇邊筆定期到期,不如放住啲股票先,老公部車擺緊時租車位,一陣要揸返返去佢屋企個月租位先,我點先知老公仲有乜嘢雜費呢,佢冇咩月結單寄返屋企咁,係Wor,仲要通知佢個保險Agent添,咁要唔要通知埋佢公司呢?

個腦好忙,冇耐有個保安叔叔話我地吵住曬,請我地出去門口外面,轉頭老爺又落埋嚟,係咁勸奶奶冷靜.咁其實都好慘既,個仔咁樣攤咗喺到,佢又幫唔到手,女人,好明白,要發洩,最簡單方法就係要鬧吓人,不如諗吓啲有建設性既事好過.

半個鐘,我企喺度前前後後,比奶奶鬧足半個鐘,鬧人其實係個好大運動量既一個動作,終於鬧到佢老人家無氣,老爺拖咗佢上的士,我都有扶奶奶上車,我中間有好平心靜氣同老爺講:「我會用盡我一切,幫老公渡過呢段時間,但有D野,我地之間真係出現左D問題,至於咩事,等你個仔好番我會叫佢同你地講,個BB我會自己好好照顧佢,你睇住奶奶先,等我諗下點樣最好去處理老公而家個情況.」我就上病房,望住老公,我其實唔太熟識佢咁,個幾月冇見過,仲要唔識郁,臉上面既肉冇曬彈性,似係躂住喺啲骨上面咁.

「你點啊?」

「...」老公冇反應,我只係聽到好多呼吸機之類既聲.

我捉住佢隻手摸摸我個肚:「你個BB啊,大咗好多.」個心UpUp地啦,不過似乎冇咩養份咁,我地之間有親人既情,但我發覺我對佢,冇咩愛意,2個月之前,我仲好崇拜佢.

出。血。性。腦。中。風,姑娘解釋完,等好耐先有時間接見我既醫生,講咗堆嘢,我冇咩聽入耳,我只對點樣,老公會好返有興趣多啲,原來冇嘢可以做到,要靠佢自己,爹地陪住我聽,不過我諗都同我一樣,對於靠老公自己呢幾隻字,信心唔大,後來經過咗啲諮詢,最後決定搏一鋪大既,轉佢出去私院...詳細病情呢度唔方便講太多了.

最後,我打包執佢堆私人物件果時,除咗衫褲之外,就得銀包,鎖匙,車匙,電話,我開返佢部電話,竟然仲有3%電,我覺得好好彩,如果熄左機,我無密碼,入唔到去,而家手頭上呢部電話,只要充返電,第2日返嚟,可以用佢手指Login佢部電話.

做人女朋友,做老婆咁耐,都未試過,想開佢啲嘢睇,而家搞到準備離婚,我又竟然會想睇吓佢部電話.

3%既希望,佢,同個女同事既嘢,會唔會係有苦衷呢?

25Week4單親媽媽樹窿週記

前排,聽過個電台節目,大概問,到底做啲咩,會比人覺得好「毒」,我尋日1個人去咗曬太陽,我自己都覺得好毒.

周圍都係一家大細,我搵咗個冇樹陰既位,鋪地蓆,除衫,搽太陽油,趴低,唔知點解,真係覺得毒到爆炸,戴住黑超,趴喺度喊,周圍都係小朋友玩沙,好開心既聲,仲有海浪聲,我喊得再大聲,只要我趴住,唔會有人聽到.

喊夠,比BB豬都吸收吓維他命D,反吓身...
偶而隔住副黑超望吓周圍,啲人見到大肚婆一條友喺度曬太陽,都望多2眼...然後又覺得自己好型...

夜晚返爹地媽咪屋企食飯,之後老豆車我返屋企.
前排我發現戶口多咗一大筆錢,我問老豆:「你戶口呢排係咪少咗xxx錢?」
「你唔好同你阿媽講啊...」我老豆笑咗:「如果唔係就到我要搵律師搞離婚啦,話時話,你用緊個律師掂唔掂㗎,我有好多老死,可以同阿XX死過Wor.」
老豆...其實你個女唔使你比錢,唔駛你介紹律師,我只要你個膊頭就夠啦.....你知嘛.......我左邊成臉眼淚...係,我而家訓練到,可以控制邊一邊有眼淚,鼻涕就要再訓練多陣...

「我都唔想同佢死過,佢而家比既,比我諗既多好多好多,加埋你呢份,其實我唔駛返工都OK.」咁其實又唔得既,不過夠我生完到BB豬上小學,我唔返工都應該冇咩問題既...

然後我唔想喺咁既氛圍坐呢程車,同老豆講笑:「你一陣都係Format咗部車Cam佢啦!一陣阿媽又好似我咁,我就要介紹返我個律師比你啦.」

有時說話真係唔駛多,好開心...我覺得比老婆食住既男人,唔衰得去邊,我阿媽食住阿爸咁多年,但老豆真係好好,我可以同老豆做到朋友,但同阿媽....佢永遠都係我阿媽,我都愛佢...

之後心血來潮,叫老豆車我返去尋日數碼港個停車場,點知老公部車,仲喺同一個時租位...我諗,我個Friend真係冇出賣我,我叫老豆停到好遠,觀察咗一陣,見無咩動靜,都係駛近啲老公部車,我落車再望望入面,老公冇死到喺入面...

佢。去。咗。邊。呢?

你有冇試過,分手後,好想知道Ex去咗邊,做緊咩呢?

有BK JM問我,咁你如果真係比你老公見到你,咁你點?
我諗我老豆會過去打佢,我估...

25Week3單親媽媽樹窿週記

好耐好耐好耐...未試過有呢種感覺,細個同男朋友分手,明明比佢撇,好討厭佢,唔想見佢,但又想知佢,而家到底做緊乜,唔知佢會唔會漏帶乜,唔知佢會唔會掛住自己,又或者....會唔會已經同緊第二個人一齊...

前日(14/5)我個朋友車我去數碼港睇戲,順便食吓嘢,傾吓計,我避開佢都都成個幾月...我避開全世界成個幾月.泊車嗰時,我見到,我真係見到,我見到老公部車,雖然泊到好遠,但我見到.我發現老公部車,喺同一個停車場入面,靠既唔係感覺,而係我一直「形」住,我朋友會同我老公講,我地前日會去邊,我已經諗到,如果,我講如果,我最後同返我老公一齊,我每晚每個鐘每分每秒,都會喺度「形」住,我老公到底會唔會去咗個女仔屋企呢?發生呢件事前,我從來都唔會Check老公,連諗都未諗過,老公有冇呃我.

我摸摸個肚,好想開聲同BB豬講,你爸爸,就喺附近,你,係咪好想見見爸爸?

我Feel唔到BB豬既回應,但我份人好公平既,佢唔回應唔代表佢唔想,如果我朋友呢個時候問我,我諗,我都係唔會出聲,但你話我100%唔想見到老公,咁肯定唔係,就好開頭講嗰種感覺,明明好討厭佢,但都想知佢點.

上個月,由我計劃搬走,到大前日,我都冇搵過呢個朋友,因為佢都識我老公,嗰時,我好驚我老公會搵到我,所以我轉咗個新既電話號碼 ,我覺得好大機會,佢會心軟放料比我老公,果然,大前日約佢出嚟,本來我已經訂咗間銅鑼灣一間餐廳,點知,前日佢打比我就話,不如車我去數碼港玩啦,少啲人唔駛逼,唔知點解,嗰一吓我已經諗到,佢可能出賣我.

不過咁,我理解,佢都係衰心軟,又一番好意,況且,我覺得,其實我老公,有權探吓個BB既,即使BB豬係喺我肚入面,咁我就即本扮睇唔到.

點知真係由Lunch之前到我地食吓嘢,傾吓計,周圍行吓,坐吓草地,戲都睇埋,到夜晚8點幾攞車走,佢部車應該冇郁過,um....

上到車,我開聲諗住打探吓:「你呢排有冇搵過我老公?」問完嗰一秒,有少少後悔,都唔會問到咩,佢有心講,頭先咁多個鐘,乜都講曬啦,唔講既,而家亦唔會認,再加上佢又可能真係唔知呢?

「冇啦,佢頭一個禮拜就係咁搵你,其實你地搞到咁,我都大概估到咩事啦,可以搞到你嬲到搬走,一定係出面亂搞啦...」

我好攰,挨咗落條B柱度,冇應佢...

佢到底有冇同老公講我地前日會出嚟呢?

定佢其實真係唔知呢?

如果我老公唔係因為我嚟數碼港,咁佢係咪同個女仔一齊嚟?

um....

...

我竟然開始懷疑我最要好朋友呃我,我好唔開心,我摸住阿BB豬,又喺度喊,BB,不如算啦,媽咪頂得好辛苦啊,不如真係就咁算啦,如果我同爸爸一齊返,講來每句說話,我都會懷疑,佢去邊,我都會懷疑,婚姻冇咗信任,好難捱,媽咪又要做一個好任性既決定,呢個決定,影響你一生,你會冇咗爸爸,你會係個單親BB,但我好有信心可以比到幸福你...倒返轉,如果爸爸媽媽喺埋一齊,我冇信心唯持到一個正常既家比你,甚至...我驚我自己都會有問題.

呢2日,我冇咩心機...

面對絕症,會面對唔同既階段:

震驚>否認>憤怒>討價還價>抑鬱>接受/放棄

我到底去到邊個階段呢?

此文章同匙時登於Baby-Kingdom